सूक्त ७६

इमं नु मायिनं हुव इन्द्रमीशानमोजसा। मरुत्वन्तं न वृञ्जसे॥

imaṁ nu māyinaṁ huva indramīśānamojasā | marutvantaṁ na vṛñjase ||

अयमिन्द्रो मरुत्सखा वि वृत्रस्याभिनच्छिरः। वज्रेण शतपर्वणा॥

ayamindro marutsakhā vi vṛtrasyābhinacchiraḥ | vajreṇa śataparvaṇā ||

वावृधानो मरुत्सखेन्द्रो वि वृत्रमैरयत्। सृजन्समुद्रिया अपः॥

vāvṛdhāno marutsakhendro vi vṛtramairayat | sṛjansamudriyā apaḥ ||

अयं ह येन वा इदं स्वर्मरुत्वता जितम्। इन्द्रेण सोमपीतये॥

ayaṁ ha yena vā idaṁ svarmarutvatā jitam | indreṇa somapītaye ||

मरुत्वन्तमृजीषिणमोजस्वन्तं विरप्शिनम्। इन्द्रं गीर्भिर्हवामहे॥

marutvantamṛjīṣiṇamojasvantaṁ virapśinam | indraṁ gīrbhirhavāmahe ||

इन्द्रं प्रत्नेन मन्मना मरुत्वन्तं हवामहे। अस्य सोमस्य पीतये॥

indraṁ pratnena manmanā marutvantaṁ havāmahe | asya somasya pītaye ||

मरुत्वाँ इन्द्र मीढ्वः पिबा सोमं शतक्रतो। अस्मिन्यज्ञे पुरुष्टुत॥

marutvā indra mīḍhvaḥ pibā somaṁ śatakrato | asminyajñe puruṣṭuta ||

तुभ्येदिन्द्र मरुत्वते सुताः सोमासो अद्रिवः। हृदा हूयन्त उक्थिनः॥

tubhyedindra marutvate sutāḥ somāso adrivaḥ | hṛdā hūyanta ukthinaḥ ||

पिबेदिन्द्र मरुत्सखा सुतं सोमं दिविष्टिषु। वज्रं शिशान ओजसा॥

pibedindra marutsakhā sutaṁ somaṁ diviṣṭiṣu | vajraṁ śiśāna ojasā ||

उत्तिष्ठन्नोजसा सह पीत्वी शिप्रे अवेपयः। सोममिन्द्र चमू सुतम्॥

uttiṣṭhannojasā saha pītvī śipre avepayaḥ | somamindra camū sutam ||

अनु त्वा रोदसी उभे क्रक्षमाणमकृपेताम्। इन्द्र यद्दस्युहाभवः॥

anu tvā rodasī ubhe krakṣamāṇamakṛpetām | indra yaddasyuhābhavaḥ ||

वाचमष्टापदीमहं नवस्रक्तिमृतस्पृशम्। इन्द्रात्परि तन्वं ममे॥

vācamaṣṭāpadīmahaṁ navasraktimṛtaspṛśam | indrātpari tanvaṁ mame ||