सूक्त ७५

युक्ष्वा हि देवहूतमाँ अश्वाँ अग्ने रथीरिव। नि होता पूर्व्यः सदः॥

yukṣvā hi devahūtamā aśvā agne rathīriva | ni hotā pūrvyaḥ sadaḥ ||

उत नो देव देवाँ अच्छा वोचो विदुष्टरः। श्रद्विश्वा वार्या कृधि॥

uta no deva devā acchā voco viduṣṭaraḥ | śradviśvā vāryā kṛdhi ||

त्वं ह यद्यविष्ठ्य सहसः सूनवाहुत। ऋतावा यज्ञियो भुवः॥

tvaṁ ha yadyaviṣṭhya sahasaḥ sūnavāhuta | ṛtāvā yajñiyo bhuvaḥ ||

अयमग्निः सहस्रिणो वाजस्य शतिनस्पतिः। मूर्धा कवी रयीणाम्॥

ayamagniḥ sahasriṇo vājasya śatinaspatiḥ | mūrdhā kavī rayīṇām ||

तं नेमिमृभवो यथा नमस्व सहूतिभिः। नेदीयो यज्ञमङ्गिरः॥

taṁ nemimṛbhavo yathā namasva sahūtibhiḥ | nedīyo yajñamaṅgiraḥ ||

तस्मै नूनमभिद्यवे वाचा विरूप नित्यया। वृष्णे चोदस्व सुष्टुतिम्॥

tasmai nūnamabhidyave vācā virūpa nityayā | vṛṣṇe codasva suṣṭutim ||

कमु ष्विदस्य सेनयाग्नेरपाकचक्षसः। पणिं गोषु स्तरामहे॥

kamu ṣvidasya senayāgnerapākacakṣasaḥ | paṇiṁ goṣu starāmahe ||

मा नो देवानां विशः प्रस्नातीरिवोस्राः। कृशं न हासुरघ्न्याः॥

mā no devānāṁ viśaḥ prasnātīrivosrāḥ | kṛśaṁ na hāsuraghnyāḥ ||

मा नः समस्य दूढ्यः परिद्वेषसो अंहतिः। ऊर्मिर्न नावमा वधीत्॥

mā naḥ samasya dūḍhyaḥ paridveṣaso aṁhatiḥ | ūrmirna nāvamā vadhīt ||

नमस्ते अग्न ओजसे गृणन्ति देव कृष्टयः। अमैरमित्रमर्दय॥

namaste agna ojase gṛṇanti deva kṛṣṭayaḥ | amairamitramardaya ||

कुवित्सु नो गविष्टयेऽग्ने संवेषिषो रयिम्। उरुकृदुरु णस्कृधि॥

kuvitsu no gaviṣṭaye'gne saṁveṣiṣo rayim | urukṛduru ṇaskṛdhi ||

मा नो अस्मिन्महाधने परा वर्ग्भारभृद्यथा। संवर्गं सं रयिं जय॥

mā no asminmahādhane parā vargbhārabhṛdyathā | saṁvargaṁ saṁ rayiṁ jaya ||

अन्यमस्मद्भिया इयमग्ने सिषक्तु दुच्छुना। वर्धा नो अमवच्छवः॥

anyamasmadbhiyā iyamagne siṣaktu ducchunā | vardhā no amavacchavaḥ ||

यस्याजुषन्नमस्विनः शमीमदुर्मखस्य वा। तं घेदग्निर्वृधावति॥

yasyājuṣannamasvinaḥ śamīmadurmakhasya vā | taṁ ghedagnirvṛdhāvati ||

परस्या अधि संवतोऽवराँ अभ्या तर। यत्राहमस्मि ताँ अव॥

parasyā adhi saṁvato'varā abhyā tara | yatrāhamasmi tā ava ||

विद्मा हि ते पुरा वयमग्ने पितुर्यथावसः। अधा ते सुम्नमीमहे॥

vidmā hi te purā vayamagne pituryathāvasaḥ | adhā te sumnamīmahe ||