Sukta 67

त्यान्नु क्षत्रियाँ अव आदित्यान्याचिषामहे। सुमृळीकाँ अभिष्टये॥

tyānnu kṣatriyā ava ādityānyāciṣāmahe | sumṛḻīkā abhiṣṭaye ||

मित्रो नो अत्यंहतिं वरुणः पर्षदर्यमा। आदित्यासो यथा विदुः॥

mitro no atyaṁhatiṁ varuṇaḥ parṣadaryamā | ādityāso yathā viduḥ ||

तेषां हि चित्रमुक्थ्यं वरूथमस्ति दाशुषे। आदित्यानामरंकृते॥

teṣāṁ hi citramukthyaṁ varūthamasti dāśuṣe | ādityānāmaraṁkṛte ||

महि वो महतामवो वरुण मित्रार्यमन्। अवांस्या वृणीमहे॥

mahi vo mahatāmavo varuṇa mitrāryaman | avāṁsyā vṛṇīmahe ||

जीवान्नो अभि धेतनादित्यासः पुरा हथात्। कद्ध स्थ हवनश्रुतः॥

jīvānno abhi dhetanādityāsaḥ purā hathāt | kaddha stha havanaśrutaḥ ||

यद्वः श्रान्ताय सुन्वते वरूथमस्ति यच्छर्दिः। तेना नो अधि वोचत॥

yadvaḥ śrāntāya sunvate varūthamasti yacchardiḥ | tenā no adhi vocata ||

अस्ति देवा अंहोरुर्वस्ति रत्नमनागसः। आदित्या अद्भुतैनसः॥

asti devā aṁhorurvasti ratnamanāgasaḥ | ādityā adbhutainasaḥ ||

मा नः सेतुः सिषेदयं महे वृणक्तु नस्परि। इन्द्र इद्धि श्रुतो वशी॥

mā naḥ setuḥ siṣedayaṁ mahe vṛṇaktu naspari | indra iddhi śruto vaśī ||

मा नो मृचा रिपूणां वृजिनानामविष्यवः। देवा अभि प्र मृक्षत॥

mā no mṛcā ripūṇāṁ vṛjinānāmaviṣyavaḥ | devā abhi pra mṛkṣata ||

उत त्वामदिते मह्यहं देव्युप ब्रुवे। सुमृळीकामभिष्टये॥

uta tvāmadite mahyahaṁ devyupa bruve | sumṛḻīkāmabhiṣṭaye ||

पर्षि दीने गभीर आँ उग्रपुत्रे जिघांसतः। माकिस्तोकस्य नो रिषत्॥

parṣi dīne gabhīra ā ugraputre jighāṁsataḥ | mākistokasya no riṣat ||

अनेहो न उरुव्रज उरूचि वि प्रसर्तवे। कृधि तोकाय जीवसे॥

aneho na uruvraja urūci vi prasartave | kṛdhi tokāya jīvase ||

ये मूर्धानः क्षितीनामदब्धासः स्वयशसः। व्रता रक्षन्ते अद्रुहः॥

ye mūrdhānaḥ kṣitīnāmadabdhāsaḥ svayaśasaḥ | vratā rakṣante adruhaḥ ||

ते न आस्नो वृकाणामादित्यासो मुमोचत। स्तेनं बद्धमिवादिते॥

te na āsno vṛkāṇāmādityāso mumocata | stenaṁ baddhamivādite ||

अपो षु ण इयं शरुरादित्या अप दुर्मतिः। अस्मदेत्वजघ्नुषी॥

apo ṣu ṇa iyaṁ śarurādityā apa durmatiḥ | asmadetvajaghnuṣī ||

शश्वद्धि वः सुदानव आदित्या ऊतिभिर्वयम्। पुरा नूनं बुभुज्महे॥

śaśvaddhi vaḥ sudānava ādityā ūtibhirvayam | purā nūnaṁ bubhujmahe ||

शश्वन्तं हि प्रचेतसः प्रतियन्तं चिदेनसः। देवाः कृणुथ जीवसे॥

śaśvantaṁ hi pracetasaḥ pratiyantaṁ cidenasaḥ | devāḥ kṛṇutha jīvase ||

तत्सु नो नव्यं सन्यस आदित्या यन्मुमोचति। बन्धाद्बद्धमिवादिते॥

tatsu no navyaṁ sanyasa ādityā yanmumocati | bandhādbaddhamivādite ||

नास्माकमस्ति तत्तर आदित्यासो अतिष्कदे। यूयमस्मभ्यं मृळत॥

nāsmākamasti tattara ādityāso atiṣkade | yūyamasmabhyaṁ mṛḻata ||

मा नो हेतिर्विवस्वत आदित्याः कृत्रिमा शरुः। पुरा नु जरसो वधीत्॥

mā no hetirvivasvata ādityāḥ kṛtrimā śaruḥ | purā nu jaraso vadhīt ||

वि षु द्वेषो व्यंहतिमादित्यासो वि संहितम्। विष्वग्वि वृहता रपः॥

vi ṣu dveṣo vyaṁhatimādityāso vi saṁhitam | viṣvagvi vṛhatā rapaḥ ||