सूक्त ९६

अस्मा उषास आतिरन्त याममिन्द्राय नक्तमूर्म्याः सुवाचः। अस्मा आपो मातरः सप्त तस्थुर्नृभ्यस्तराय सिन्धवः सुपाराः॥

asmā uṣāsa ātiranta yāmamindrāya naktamūrmyāḥ suvācaḥ | asmā āpo mātaraḥ sapta tasthurnṛbhyastarāya sindhavaḥ supārāḥ ||

अतिविद्धा विथुरेणा चिदस्त्रा त्रिः सप्त सानु संहिता गिरीणाम्। न तद्देवो न मर्त्यस्तुतुर्याद्यानि प्रवृद्धो वृषभश्चकार॥

atividdhā vithureṇā cidastrā triḥ sapta sānu saṁhitā girīṇām | na taddevo na martyastuturyādyāni pravṛddho vṛṣabhaścakāra ||

इन्द्रस्य वज्र आयसो निमिश्ल इन्द्रस्य बाह्वोर्भूयिष्ठमोजः। शीर्षन्निन्द्रस्य क्रतवो निरेक आसन्नेषन्त श्रुत्या उपाके॥

indrasya vajra āyaso nimiśla indrasya bāhvorbhūyiṣṭhamojaḥ | śīrṣannindrasya kratavo nireka āsanneṣanta śrutyā upāke ||

मन्ये त्वा यज्ञियं यज्ञियानां मन्ये त्वा च्यवनमच्युतानाम्। मन्ये त्वा सत्वनामिन्द्र केतुं मन्ये त्वा वृषभं चर्षणीनाम्॥

manye tvā yajñiyaṁ yajñiyānāṁ manye tvā cyavanamacyutānām | manye tvā satvanāmindra ketuṁ manye tvā vṛṣabhaṁ carṣaṇīnām ||

आ यद्वज्रं बाह्वोरिन्द्र धत्से मदच्युतमहये हन्तवा उ। प्र पर्वता अनवन्त प्र गावः प्र ब्रह्माणो अभिनक्षन्त इन्द्रम्॥

ā yadvajraṁ bāhvorindra dhatse madacyutamahaye hantavā u | pra parvatā anavanta pra gāvaḥ pra brahmāṇo abhinakṣanta indram ||

तमु ष्टवाम य इमा जजान विश्वा जातान्यवराण्यस्मात्। इन्द्रेण मित्रं दिधिषेम गीर्भिरुपो नमोभिर्वृषभं विशेम॥

tamu ṣṭavāma ya imā jajāna viśvā jātānyavarāṇyasmāt | indreṇa mitraṁ didhiṣema gīrbhirupo namobhirvṛṣabhaṁ viśema ||

वृत्रस्य त्वा श्वसथादीषमाणा विश्वे देवा अजहुर्ये सखायः। मरुद्भिरिन्द्र सख्यं ते अस्त्वथेमा विश्वाः पृतना जयासि॥

vṛtrasya tvā śvasathādīṣamāṇā viśve devā ajahurye sakhāyaḥ | marudbhirindra sakhyaṁ te astvathemā viśvāḥ pṛtanā jayāsi ||

त्रिः षष्टिस्त्वा मरुतो वावृधाना उस्रा इव राशयो यज्ञियासः। उप त्वेमः कृधि नो भागधेयं शुष्मं त एना हविषा विधेम॥

triḥ ṣaṣṭistvā maruto vāvṛdhānā usrā iva rāśayo yajñiyāsaḥ | upa tvemaḥ kṛdhi no bhāgadheyaṁ śuṣmaṁ ta enā haviṣā vidhema ||

तिग्ममायुधं मरुतामनीकं कस्त इन्द्र प्रति वज्रं दधर्ष। अनायुधासो असुरा अदेवाश्चक्रेण ताँ अप वप ऋजीषिन्॥

tigmamāyudhaṁ marutāmanīkaṁ kasta indra prati vajraṁ dadharṣa | anāyudhāso asurā adevāścakreṇa tā apa vapa ṛjīṣin ||

मह उग्राय तवसे सुवृक्तिं प्रेरय शिवतमाय पश्वः। गिर्वाहसे गिर इन्द्राय पूर्वीर्धेहि तन्वे कुविदङ्ग वेदत्॥

maha ugrāya tavase suvṛktiṁ preraya śivatamāya paśvaḥ | girvāhase gira indrāya pūrvīrdhehi tanve kuvidaṅga vedat ||

उक्थवाहसे विभ्वे मनीषां द्रुणा न पारमीरया नदीनाम्। नि स्पृश धिया तन्वि श्रुतस्य जुष्टतरस्य कुविदङ्ग वेदत्॥

ukthavāhase vibhve manīṣāṁ druṇā na pāramīrayā nadīnām | ni spṛśa dhiyā tanvi śrutasya juṣṭatarasya kuvidaṅga vedat ||

तद्विविड्ढि यत्त इन्द्रो जुजोषत्स्तुहि सुष्टुतिं नमसा विवास। उप भूष जरितर्मा रुवण्यः श्रावया वाचं कुविदङ्ग वेदत्॥

tadviviḍḍhi yatta indro jujoṣatstuhi suṣṭutiṁ namasā vivāsa | upa bhūṣa jaritarmā ruvaṇyaḥ śrāvayā vācaṁ kuvidaṅga vedat ||

अव द्रप्सो अंशुमतीमतिष्ठदियानः कृष्णो दशभिः सहस्रैः। आवत्तमिन्द्रः शच्या धमन्तमप स्नेहितीर्नृमणा अधत्त॥

ava drapso aṁśumatīmatiṣṭhadiyānaḥ kṛṣṇo daśabhiḥ sahasraiḥ | āvattamindraḥ śacyā dhamantamapa snehitīrnṛmaṇā adhatta ||

द्रप्समपश्यं विषुणे चरन्तमुपह्वरे नद्यो अंशुमत्याः। नभो न कृष्णमवतस्थिवांसमिष्यामि वो वृषणो युध्यताजौ॥

drapsamapaśyaṁ viṣuṇe carantamupahvare nadyo aṁśumatyāḥ | nabho na kṛṣṇamavatasthivāṁsamiṣyāmi vo vṛṣaṇo yudhyatājau ||

अध द्रप्सो अंशुमत्या उपस्थेऽधारयत्तन्वं तित्विषाणः। विशो अदेवीरभ्याचरन्तीर्बृहस्पतिना युजेन्द्रः ससाहे॥

adha drapso aṁśumatyā upasthe'dhārayattanvaṁ titviṣāṇaḥ | viśo adevīrabhyācarantīrbṛhaspatinā yujendraḥ sasāhe ||

त्वं ह त्यत्सप्तभ्यो जायमानोऽशत्रुभ्यो अभवः शत्रुरिन्द्र। गूळ्हे द्यावापृथिवी अन्वविन्दो विभुमद्भ्यो भुवनेभ्यो रणं धाः॥

tvaṁ ha tyatsaptabhyo jāyamāno'śatrubhyo abhavaḥ śatrurindra | gūḻhe dyāvāpṛthivī anvavindo vibhumadbhyo bhuvanebhyo raṇaṁ dhāḥ ||

त्वं ह त्यदप्रतिमानमोजो वज्रेण वज्रिन्धृषितो जघन्थ। त्वं शुष्णस्यावातिरो वधत्रैस्त्वं गा इन्द्र शच्येदविन्दः॥

tvaṁ ha tyadapratimānamojo vajreṇa vajrindhṛṣito jaghantha | tvaṁ śuṣṇasyāvātiro vadhatraistvaṁ gā indra śacyedavindaḥ ||

त्वं ह त्यद्वृषभ चर्षणीनां घनो वृत्राणां तविषो बभूथ। त्वं सिन्धूँरसृजस्तस्तभानान्त्वमपो अजयो दासपत्नीः॥

tvaṁ ha tyadvṛṣabha carṣaṇīnāṁ ghano vṛtrāṇāṁ taviṣo babhūtha | tvaṁ sindhūrasṛjastastabhānāntvamapo ajayo dāsapatnīḥ ||

स सुक्रतू रणिता यः सुतेष्वनुत्तमन्युर्यो अहेव रेवान्। य एक इन्नर्यपांसि कर्ता स वृत्रहा प्रतीदन्यमाहुः॥

sa sukratū raṇitā yaḥ suteṣvanuttamanyuryo aheva revān | ya eka innaryapāṁsi kartā sa vṛtrahā pratīdanyamāhuḥ ||

स वृत्रहेन्द्रश्चर्षणीधृत्तं सुष्टुत्या हव्यं हुवेम। स प्राविता मघवा नोऽधिवक्ता स वाजस्य श्रवस्यस्य दाता॥

sa vṛtrahendraścarṣaṇīdhṛttaṁ suṣṭutyā havyaṁ huvema | sa prāvitā maghavā no'dhivaktā sa vājasya śravasyasya dātā ||

स वृत्रहेन्द्र ऋभुक्षाः सद्यो जज्ञानो हव्यो बभूव। कृण्वन्नपांसि नर्या पुरूणि सोमो न पीतो हव्यः सखिभ्यः॥

sa vṛtrahendra ṛbhukṣāḥ sadyo jajñāno havyo babhūva | kṛṇvannapāṁsi naryā purūṇi somo na pīto havyaḥ sakhibhyaḥ ||