सूक्त २९

प्रास्य धारा अक्षरन्वृष्णः सुतस्यौजसा। देवाँ अनु प्रभूषतः॥

prāsya dhārā akṣaranvṛṣṇaḥ sutasyaujasā | devā anu prabhūṣataḥ ||

FORWARD with mighty force have flowed the currents of this Steer effused, Of him who sets him by the Gods.

सप्तिं मृजन्ति वेधसो गृणन्तः कारवो गिरा। ज्योतिर्जज्ञानमुक्थ्यम्॥

saptiṁ mṛjanti vedhaso gṛṇantaḥ kāravo girā | jyotirjajñānamukthyam ||

The singers praise him with their song, and learned priests adorn the Steed, Brought forth as light that merits laud.

सुषहा सोम तानि ते पुनानाय प्रभूवसो। वर्धा समुद्रमुक्थ्यम्॥

suṣahā soma tāni te punānāya prabhūvaso | vardhā samudramukthyam ||

These things thou winnest lightly while purified, Soma, Lord of wealth: Fill full the sea that claims our praise.

विश्वा वसूनि संजयन्पवस्व सोम धारया। इनु द्वेषांसि सध्र्यक्॥

viśvā vasūni saṁjayanpavasva soma dhārayā | inu dveṣāṁsi sadhryak ||

Winning all precious things at once, flow on, O Soma, with thy stream Drive to one place our enemies.

रक्षा सु नो अररुषः स्वनात्समस्य कस्य चित्। निदो यत्र मुमुच्महे॥

rakṣā su no araruṣaḥ svanātsamasya kasya cit | nido yatra mumucmahe ||

Preserve us from the godless, from ill-omened voice of one and all, That so we may be freed from blame.

एन्दो पार्थिवं रयिं दिव्यं पवस्व धारया। द्युमन्तं शुष्ममा भर॥

endo pārthivaṁ rayiṁ divyaṁ pavasva dhārayā | dyumantaṁ śuṣmamā bhara ||

O Indu, as thou flowest on bring us the wealth of earth and heaven, And splendid vigour, in thy stream.