Sukta 83

देवानामिदवो महत्तदा वृणीमहे वयम्। वृष्णामस्मभ्यमूतये॥

devānāmidavo mahattadā vṛṇīmahe vayam | vṛṣṇāmasmabhyamūtaye ||

ते नः सन्तु युजः सदा वरुणो मित्रो अर्यमा। वृधासश्च प्रचेतसः॥

te naḥ santu yujaḥ sadā varuṇo mitro aryamā | vṛdhāsaśca pracetasaḥ ||

अति नो विष्पिता पुरु नौभिरपो न पर्षथ। यूयमृतस्य रथ्यः॥

ati no viṣpitā puru naubhirapo na parṣatha | yūyamṛtasya rathyaḥ ||

वामं नो अस्त्वर्यमन्वामं वरुण शंस्यम्। वामं ह्यावृणीमहे॥

vāmaṁ no astvaryamanvāmaṁ varuṇa śaṁsyam | vāmaṁ hyāvṛṇīmahe ||

वामस्य हि प्रचेतस ईशानाशो रिशादसः। नेमादित्या अघस्य यत्॥

vāmasya hi pracetasa īśānāśo riśādasaḥ | nemādityā aghasya yat ||

वयमिद्वः सुदानवः क्षियन्तो यान्तो अध्वन्ना। देवा वृधाय हूमहे॥

vayamidvaḥ sudānavaḥ kṣiyanto yānto adhvannā | devā vṛdhāya hūmahe ||

अधि न इन्द्रैषां विष्णो सजात्यानाम्। इता मरुतो अश्विना॥

adhi na indraiṣāṁ viṣṇo sajātyānām | itā maruto aśvinā ||

प्र भ्रातृत्वं सुदानवोऽध द्विता समान्या। मातुर्गर्भे भरामहे॥

pra bhrātṛtvaṁ sudānavo'dha dvitā samānyā | māturgarbhe bharāmahe ||

यूयं हि ष्ठा सुदानव इन्द्रज्येष्ठा अभिद्यवः। अधा चिद्व उत ब्रुवे॥

yūyaṁ hi ṣṭhā sudānava indrajyeṣṭhā abhidyavaḥ | adhā cidva uta bruve ||