सूक्त ९०

आ नो विश्वासु हव्य इन्द्रः समत्सु भूषतु। उप ब्रह्माणि सवनानि वृत्रहा परमज्या ऋचीषमः॥

ā no viśvāsu havya indraḥ samatsu bhūṣatu | upa brahmāṇi savanāni vṛtrahā paramajyā ṛcīṣamaḥ ||

त्वं दाता प्रथमो राधसामस्यसि सत्य ईशानकृत्। तुविद्युम्नस्य युज्या वृणीमहे पुत्रस्य शवसो महः॥

tvaṁ dātā prathamo rādhasāmasyasi satya īśānakṛt | tuvidyumnasya yujyā vṛṇīmahe putrasya śavaso mahaḥ ||

ब्रह्मा त इन्द्र गिर्वणः क्रियन्ते अनतिद्भुता। इमा जुषस्व हर्यश्व योजनेन्द्र या ते अमन्महि॥

brahmā ta indra girvaṇaḥ kriyante anatidbhutā | imā juṣasva haryaśva yojanendra yā te amanmahi ||

त्वं हि सत्यो मघवन्ननानतो वृत्रा भूरि न्यृञ्जसे। स त्वं शविष्ठ वज्रहस्त दाशुषेऽर्वाञ्चं रयिमा कृधि॥

tvaṁ hi satyo maghavannanānato vṛtrā bhūri nyṛñjase | sa tvaṁ śaviṣṭha vajrahasta dāśuṣe'rvāñcaṁ rayimā kṛdhi ||

त्वमिन्द्र यशा अस्यृजीषी शवसस्पते। त्वं वृत्राणि हंस्यप्रतीन्येक इदनुत्ता चर्षणीधृता॥

tvamindra yaśā asyṛjīṣī śavasaspate | tvaṁ vṛtrāṇi haṁsyapratīnyeka idanuttā carṣaṇīdhṛtā ||

तमु त्वा नूनमसुर प्रचेतसं राधो भागमिवेमहे। महीव कृत्तिः शरणा त इन्द्र प्र ते सुम्ना नो अश्नवन्॥

tamu tvā nūnamasura pracetasaṁ rādho bhāgamivemahe | mahīva kṛttiḥ śaraṇā ta indra pra te sumnā no aśnavan ||