सूक्त ८५

आ मे हवं नासत्याश्विना गच्छतं युवम्। मध्वः सोमस्य पीतये॥

ā me havaṁ nāsatyāśvinā gacchataṁ yuvam | madhvaḥ somasya pītaye ||

इमं मे स्तोममश्विनेमं मे शृणुतं हवम्। मध्वः सोमस्य पीतये॥

imaṁ me stomamaśvinemaṁ me śṛṇutaṁ havam | madhvaḥ somasya pītaye ||

अयं वां कृष्णो अश्विना हवते वाजिनीवसू। मध्वः सोमस्य पीतये॥

ayaṁ vāṁ kṛṣṇo aśvinā havate vājinīvasū | madhvaḥ somasya pītaye ||

शृणुतं जरितुर्हवं कृष्णस्य स्तुवतो नरा। मध्वः सोमस्य पीतये॥

śṛṇutaṁ jariturhavaṁ kṛṣṇasya stuvato narā | madhvaḥ somasya pītaye ||

छर्दिर्यन्तमदाभ्यं विप्राय स्तुवते नरा। मध्वः सोमस्य पीतये॥

chardiryantamadābhyaṁ viprāya stuvate narā | madhvaḥ somasya pītaye ||

गच्छतं दाशुषो गृहमित्था स्तुवतो अश्विना। मध्वः सोमस्य पीतये॥

gacchataṁ dāśuṣo gṛhamitthā stuvato aśvinā | madhvaḥ somasya pītaye ||

युञ्जाथां रासभं रथे वीड्वङ्गे वृषण्वसू। मध्वः सोमस्य पीतये॥

yuñjāthāṁ rāsabhaṁ rathe vīḍvaṅge vṛṣaṇvasū | madhvaḥ somasya pītaye ||

त्रिवन्धुरेण त्रिवृता रथेना यातमश्विना। मध्वः सोमस्य पीतये॥

trivandhureṇa trivṛtā rathenā yātamaśvinā | madhvaḥ somasya pītaye ||

नू मे गिरो नासत्याश्विना प्रावतं युवम्। मध्वः सोमस्य पीतये॥

nū me giro nāsatyāśvinā prāvataṁ yuvam | madhvaḥ somasya pītaye ||